گئجه خلوتجه بيزه سئوگيلي يار گلميش ايدي،
اوزو آيدان دا گؤزل نازلي نيگار گلميش ايدي.

تر آخيب گول ياناغيندان، بولود اؤرتموشدو آيي،
اونو دوشمنمي قوووب، كؤنلو قوبار گلميش ايدي؟

اونا من گؤز يئتيريب خلوتي باخديم، باخديم،
اووچونون اوولاغينا كؤرپه شيكار گلميش ايدي.

اويويوب هر ايكيميز راحت اولوب بير ياتديق،
بختيمين باغچاسينا گوللو باهار گلميش ايدي.

دئدي: - گئتمك دميدير، سؤيله، نه ايسترسن يار؟
بير اؤپوش ايسته‌ديم اوندان... يئري وار، گلميش ايدي.

آغلاييب گئتدي او يار، گؤز ياشي يانديردي مني،
اودلارا ياندي ديليم، سانكي شرار گلميش ايدي.

ائي نظامي! - دئدي - بيردن آييليب، گؤردوم او يوخ،
دئمه رؤيادا بيزه چشمي-خومار گلميش ايدي.